Ashwaveega News 24×7 ಮಾರ್ಚ್ 18– 2026 : “ಯುಗಯುಗಾದಿ ಕಳೆದರೂ ಯುಗಾದಿ ಮರಳಿ ಬರುತ್ತಿದೆ” ಎಂಬಂತೆ ಹೊಸ ಆಶೆಗಳು, ಹೊಸ ಆರಂಭಗಳ ಸಂಕೇತವಾಗಿ ಯುಗಾದಿ ಹಬ್ಬವನ್ನು ಆಚರಿಸಲಾಗುತ್ತದೆ. ಈ ಹಬ್ಬದಂದು ದೇವರ ಪೂಜೆಯ ಜೊತೆಗೆ ಕುಟುಂಬದವರು, ಸ್ನೇಹಿತರು ಹಾಗೂ ಬಂಧುಗಳು ಪರಸ್ಪರ ಬೇವು-ಬೆಲ್ಲ ಹಂಚಿಕೊಳ್ಳುವ ಸಂಪ್ರದಾಯ ಇದೆ.
ಸಂಕ್ರಾಂತಿ ಹಬ್ಬದಲ್ಲಿ ಎಳ್ಳು-ಬೆಲ್ಲ ಸವಿಯುವಂತೆ, ಯುಗಾದಿ ದಿನ ಬೇವು-ಬೆಲ್ಲ ಸೇವಿಸುವುದು ಕೇವಲ ಆಚರಣೆ ಮಾತ್ರವಲ್ಲ; ಇದರ ಹಿಂದೆ ಸ್ಪಷ್ಟವಾದ ವೈಜ್ಞಾನಿಕ ಕಾರಣವೂ ಅಡಗಿದೆ.
ಯುಗಾದಿ ಸಾಮಾನ್ಯವಾಗಿ ವಸಂತ ಋತುವಿನ ಆರಂಭವನ್ನು ಸೂಚಿಸುತ್ತದೆ. ಈ ಸಮಯದಲ್ಲಿ ವಾತಾವರಣದಲ್ಲಿ ಉಷ್ಣಾಂಶ ಹೆಚ್ಚಾಗುತ್ತಿದ್ದು, ದೇಹದಲ್ಲಿ ‘ಪಿತ್ತ’ ಅಂಶವೂ ಹೆಚ್ಚಾಗುವ ಸಾಧ್ಯತೆ ಇರುತ್ತದೆ. ಇದರ ಪರಿಣಾಮವಾಗಿ ಹೊಟ್ಟೆ ಸಮಸ್ಯೆಗಳು, ಬಾಯಿಹುಣ್ಣು, ವಾಂತಿ, ಎದೆ ಉರಿ, ತುರಿಕೆ ಮುಂತಾದ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು.
ಇದನ್ನು ನಿಯಂತ್ರಿಸಲು ಬೇವು ಮತ್ತು ಬೆಲ್ಲದ ಸಂಯೋಜನೆ ಸಹಕಾರಿ. ಬೇವು ಕಹಿ ಸ್ವಭಾವ ಹೊಂದಿದ್ದು, ದೇಹದ ವಿಷಕಾರಿ ಅಂಶಗಳನ್ನು ನಿವಾರಿಸಲು ಹಾಗೂ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ. ಬೆಲ್ಲ ಸಿಹಿ ಗುಣ ಹೊಂದಿದ್ದು, ಶಕ್ತಿಯನ್ನು ನೀಡುವುದರ ಜೊತೆಗೆ ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ.
ಹೀಗಾಗಿ ಬೇವು-ಬೆಲ್ಲ ಸೇವನೆಯಿಂದ ದೇಹದ ಪಿತ್ತದ ಅಂಶ ಸಮತೋಲನವಾಗಿದ್ದು, ಋತು ಬದಲಾವಣೆಯಿಂದ ಉಂಟಾಗುವ ಆರೋಗ್ಯ ಸಮಸ್ಯೆಗಳನ್ನು ತಡೆಗಟ್ಟಲು ಸಹಕಾರಿ ಆಗುತ್ತದೆ.
ಒಟ್ಟಾರೆ, ಯುಗಾದಿ ದಿನ ಬೇವು-ಬೆಲ್ಲ ಹಂಚಿಕೊಳ್ಳುವ ಸಂಪ್ರದಾಯವು ಜೀವನದ ಸಿಹಿ-ಕಹಿ ಅನುಭವಗಳನ್ನು ಒಪ್ಪಿಕೊಳ್ಳುವ ಸಂದೇಶ ನೀಡುವುದರ ಜೊತೆಗೆ, ಆರೋಗ್ಯದ ದೃಷ್ಟಿಯಿಂದಲೂ ಮಹತ್ವ ಹೊಂದಿದೆ.
