RangiTaranga to re-release after a decade
2015ರಲ್ಲಿ ತೆರೆಕಂಡು ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದ್ದ ‘ರಂಗಿತರಂಗ’ ಚಿತ್ರ 10 ವರ್ಷಗಳ ಬಳಿಕ ಇದೀಗ ಮತ್ತೆ ಬೆಳ್ಳಿ ಪರದೆಗೆ ಮರಳುತ್ತಿದೆ. ಅನೂಪ್ ಭಂಡಾರಿ ನಿರ್ದೇಶನದ ಮತ್ತು ಎಚ್‌ಕೆ ಪ್ರಕಾಶ್ ನಿರ್ಮಾಣದ ಈ ಚಿತ್ರವು ಜುಲೈ 4 ರಂದು ರಾಜ್ಯದಾದ್ಯಂತ ಮರು ಬಿಡುಗಡೆಯಾಗಲಿದೆ.
ನಿರ್ದೇಶಕ ಅನೂಪ್ ಭಂಡಾರಿ ಜೊತೆಗೆ, ರಂಗಿತರಂಗ ಚಿತ್ರದ ಪಾತ್ರವರ್ಗ ಮತ್ತು ಸಿಬ್ಬಂದಿ ಚಿತ್ರ ನಿರ್ಮಾಣದ ನೆನಪುಗಳನ್ನು ಹಂಚಿಕೊಂಡರು. ಅಂತರರಾಷ್ಟ್ರೀಯ ಕಿರುಚಿತ್ರಗಳಿಂದ ಚಲನಚಿತ್ರ ನಿರ್ದೇಶನಕ್ಕೆ ಮುಂದಾದ ಅನೂಪ್ ಭಂಡಾರಿ, ಚಿತ್ರದ ಅಭೂತಪೂರ್ವ ಯಶಸ್ಸಿನ ಬಗ್ಗೆ ಇನ್ನೂ ಆಶ್ಚರ್ಯ ವ್ಯಕ್ತಪಡಿಸುತ್ತಾರೆ.
‘ನಾವು 2015ರಲ್ಲಿ ಚಿತ್ರವನ್ನು ಬಿಡುಗಡೆ ಮಾಡಿದಾಗ, ನಮ್ಮ ಪೋಸ್ಟರ್ ವೆಚ್ಚವನ್ನಾದರೂ ನಾವು ಮರಳಿ ಪಡೆಯುತ್ತೇವೆಯೇ ಎಂದು ಕೆಲವರು ಅನುಮಾನಿಸಿದರು. ಆದರೆ, ಪ್ರೇಕ್ಷಕರು ನಮ್ಮ ಬೆಂಬಲಕ್ಕೆ ನಿಂತರು. ಬಾಹುಬಲಿ ಮತ್ತು ಭಜರಂಗಿ ಭಾಯಿಜಾನ್ ಜೊತೆಗೆ ಬಿಡುಗಡೆಯಾದರೂ, ನಮ್ಮ ಚಿತ್ರವು ಯಶಸ್ವಿಯಾಯಿತು ಮತ್ತು ಅಮೆರಿಕದಲ್ಲಿ ಕನ್ನಡ ಚಿತ್ರರಂಗಕ್ಕೆ ಹೊಸ ಮಾರುಕಟ್ಟೆಯನ್ನು ತೆರೆಯಿತು. ಇದು ನ್ಯೂಯಾರ್ಕ್ ಬಾಕ್ಸ್ ಆಫೀಸ್ ಪಟ್ಟಿಯಲ್ಲಿ ಕಾಣಿಸಿಕೊಂಡ ಮೊದಲ ಕನ್ನಡ ಚಿತ್ರವಾಗಿತ್ತು. ರಾಜ್ಯದಲ್ಲಿ ಚಿತ್ರ ಒಂದು ವರ್ಷ ಓಡಿತು’ ಎಂದು ನಿರ್ದೇಶಕರು ಹೇಳುತ್ತಾರೆ.
‘ಇದೀಗ 10 ವರ್ಷಗಳ ಬಳಿಕ ರೀರಿಲೀಸ್ ಆಗುತ್ತಿದೆ. ಇದೊಂದು ಆಚರಣೆಯಾಗಿದೆ. ಇಂದಿನ ಪೀಳಿಗೆಗೆ ಚಿತ್ರಮಂದಿರಗಳಲ್ಲಿ ಈ ಚಿತ್ರವನ್ನು ವೀಕ್ಷಿಸಲು ಒಂದು ಅವಕಾಶವಾಗಿದೆ. ಚಿತ್ರವು ಆನ್‌ಲೈನ್‌ನಲ್ಲಿ ಲಭ್ಯವಿಲ್ಲದ ಕಾರಣ, ಅದನ್ನು ರೀರಿಲೀಸ್ ಮಾಡಲು ಇದು ಸರಿಯಾದ ಸಮಯ ಎಂದು ನಾವು ಭಾವಿಸಿದ್ದೇವೆ.
ಟ್ರೇಲರ್ ಸುತ್ತಲಿನ ಉತ್ಸಾಹವು ನಮ್ಮನ್ನು ಭಾವುಕರನ್ನಾಗಿ ಮಾಡಿತು. ಇದು ಮತ್ತೆ ಕನಸಿನಂತೆ ಭಾಸವಾಯಿತು. ರಾಧಿಕಾ ಮತ್ತು ನಿರೂಪ್ ಭಂಡಾರಿ ಕೂಡ ಇದನ್ನು ನೋಡಿ ಭಾವುಕರಾದರು’ ಎಂದು ಅನೂಪ್ ತಿಳಿಸಿದರು.
ಹಿರಿಯ ನಟ ಸಾಯಿಕುಮಾರ್, ‘ಪೊಲೀಸ್ ಸ್ಟೋರಿ ಮತ್ತು ರಂಗಿತರಂಗ ನನ್ನ ಎರಡು ಕಣ್ಣುಗಳಿದ್ದಂತೆ. ಇಂದಿಗೂ ಜನರು ಚಿತ್ರದಲ್ಲಿನ ನನ್ನ ಪಾತ್ರವನ್ನು ಮೆಚ್ಚುತ್ತಾರೆ. ಮರು ಬಿಡುಗಡೆಯು ಹೆಚ್ಚಿನ ದಾಖಲೆಗಳನ್ನು ಸೃಷ್ಟಿಸುತ್ತದೆ ಎಂದು ನಾನು ಭಾವಿಸುತ್ತೇನೆ’ ಎಂದರು.
