ರಶ್ಮಿಕಾಗೆ ಶುಭ ಹಾರೈಸಿದ ಶಿವಣ್ಣ !

ತಮ್ಮ ಇತ್ತೀಚಿನ ‘ಕುಬೇರ’ ಚಿತ್ರದ ಯಶಸ್ಸಿನ ಖುಷಿಯಲ್ಲಿರುವ ಬಹುಭಾಷಾ ನಟಿ ರಶ್ಮಿಕಾ ಮಂದಣ್ಣ ಅವರಿಂದು ‘ಮೈಸಾ’ ಎಂಬ ಹೊಸ ಸಿನಿಮಾವನ್ನು ಘೋಷಿಸಿದ್ದಾರೆ. 2021ರಲ್ಲಿ ತೆಲುಗು ಸೋಷಿಯಲ್​ ಡ್ರಾಮಾ ‘ಅರ್ಧ ಶತಬ್ದಂ’ ಮೂಲಕ ನಿರ್ದೇಶನಕ್ಕಿಳಿದ ರವೀಂದ್ರ ಪುಲ್ಲೆ ನಿರ್ದೇಶನದ ಈ ಚಿತ್ರದ ಮೊದಲ ನೋಟ ಇಂದು ಅನಾವರಣಗೊಂಡಿದೆ. ಈ ‘ಮೈಸಾ’ ಐದು ಭಾಷೆಗಳಲ್ಲಿ ಅಂದರೆ ಕನ್ನಡ, ಹಿಂದಿ, ತಮಿಳು, ತೆಲುಗು ಮತ್ತು ಮಲಯಾಳಂನಲ್ಲಿ ಬಿಡುಗಡೆಯಾಗಲಿದೆ.

ಫಸ್ಟ್ ಲುಕ್ ಪೋಸ್ಟರ್‌ನಲ್ಲಿ, ರಶ್ಮಿಕಾ ಉಗ್ರ ಮತ್ತು ರಕ್ತಸಿಕ್ತವಾಗಿ ಕಾಣಿಸಿಕೊಂಡಿದ್ದಾರೆ. ಕ್ಲೋಸ್ ಅಪ್‌ ಲುಕ್​​​​ನಲ್ಲಿ ನಟಿಯ ಮುಖ ರಕ್ತದಿಂದ ಕೂಡಿದ್ದು, ಕತ್ತಿಯಂತೆ ಕಾಣುವ ಆಯುಧವನ್ನು ಹಿಡಿದಿದ್ದಾರೆ. ಕೂದಲು ಕೆದರಿದ್ದು, ಆಕ್ರಮಣಕಾರಿಯಾಗಿ, ಯುದ್ಧಕ್ಕೆ ಸಿದ್ಧರಾಗಿರುವಂತೆ ಕಾಣಿಸಿಕೊಂಡಿದ್ದು, ನಟಿಯ ನೋಟ ಸೋಷಿಯಲ್​ ಮೀಡಿಯಾದಲ್ಲಿ ಸಖತ್​​ ಸದ್ದು ಮಾಡುತ್ತಿದೆ. ನಟಿಯ ಈ ಹೊಸ ಪ್ರಾಜೆಕ್ಟ್​​​ಗೆ ಕರುನಾಡ ಚಕ್ರವರ್ತಿ ಖ್ಯಾತಿಯ ಶಿವರಾಜ್​​​ಕುಮಾರ್ ಶುಭ ಕೋರಿದ್ದಾರೆ.

ತಮ್ಮ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ನಟಿಯ ಫಸ್ಟ್​ ಲುಕ್​ ಪೋಸ್ಟರ್ ಹಂಚಿಕೊಂಡ ಶಿವರಾಜ್​​ಕುಮಾರ್, ”ನಿಮಗೆ ಶುಭ ಹಾರೈಸುತ್ತೇನೆ ರಶ್ಮಿಕಾ ಮಂದಣ್ಣ, ಮೈಸಾ” ಎಂದು ಬರೆದುಕೊಂಡಿದ್ದಾರೆ.

ಶಿವಣ್ಣನ ಬೆಂಬಲಕ್ಕೆ ರಶ್ಮಿಕಾ ಮಂದಣ್ಣ ಹೃದಯಪೂರ್ವಕ ಧನ್ಯವಾದ ಅರ್ಪಿಸಿದ್ದಾರೆ. ಶಿವರಾಜ್​ಕುಮಾರ್ ಅವರ ಟ್ವೀಟ್​​ ಅನ್ನು ರೀಟ್ವೀಟ್ ಮಾಡಿ, ”ಶಿವಣ್ಣ ಸರ್! ತುಂಬಾ ಧನ್ಯವಾದಗಳು. ತುಂಬಾನೇ ಗೌರವ ಅನಿಸುತ್ತಿದೆ!” ಎಂದು ಬರೆದುಕೊಂಡಿದ್ದಾರೆ.